დევი ხეჩინაშვილი: უნიკალური ქვეყანა ვართ, სადაც მთავრობა დაზღვევას რისკების სამართავად არ იყენებს
მოგების
გადასახადის რეფორმის ძალაში შესვლა გადავადებულია. მთავრობის
განმარტებით, გადაწყვეტილება ბიზნესის რეკომენდაციით მიიღეს. კიდევ უფრო
მეტად გადაიწია ამ ვადამ საფინანსო სექტორისთვის, რომელიც ისედაც გვიან
ისარგებლებდა იმ შეღავათით, რასაც ესტონური მოდელი სთავაზობს ბიზნესს.
საფინანსო სექტორში სადაზღვევო ბიზნესიც იგულისხმება. სადაზღვევო
ასოციაციის ხელმძღვანელმა დევი ხეჩინაშვილმა ისაუბრა ამ თემაზე გადაცემა
„ბიზნესკონტაქტის“ ეთერში.
- თქვენთვის თუ არის გასაგები ის მოტივაცია, თუ რატომ გადავადდა მოგების გადასახადის ესტონური მოდელის ამოქმედება?
-
ჩვენთვის ნათელი არ არის თუ რა პრინციპით გააერთიანა მთავრობამ ფინანსური
სექტორი ამ თვალსაზრისით, იმიტომ რომ ამ სექტორში 3 ინდუსტრია მონაწილეობს,
ყველას თავისი პრობლემები აქვს და თავისი განვითარების ვექტორები. ჩვენს
შემთხვევაში ნამდვილად ვიცით ერთი რამ, რომ თავიდან ძალიან გვჭირდებოდა
ჩართვა და ამის არგუმენტაციაც გვქონდა უბრალოდ არ მიიღეს ამ ეტაპზე. ახლა
გაგვიჩნდა ერთი პრობლემა, რომ ჩვენ საქართველოში იმ ზრდაზე და
განვითარებაზე ორიენტირებულ რეფორმაში არ ვართ ჩართულები თავიდანვე, იმ
დროს როცა ძალიან გვჭირდება კაპიტალიზაციის გაზრდის მხრივ. როდესაც ჩვენ
ინვესტორები დაგვისვამენ კითხვას თუ რა იყო გადავადების მიზეზი, ძალიან
გაგვიჭირდება ამაზე პასუხის გაცემა და შეიძლება იყოს აღქმული, რომ
მთავრობას სადაზღვევო სექტორის განვითარება ნაკლებად აინტერესებს.
-
პირველ რიგში რა მიუთითებს ამაზე, გადაწყვეტილება თუ პროცესები, რომელიც
ხდება სადაზღვევო ბაზართან დაკავშირებით, იმიტომ რომ ხშირად არის საუბრები
თითქოს სახელმწიფო კონკურენტი ხდება ამ ბაზარზე. ეთანხმებით ამ შეფასებას?
-
ჯერჯერობით ლაპარაკია ჯანდაცვის რეფორმაზე. კონკურენციაზე ნამდვილად არ
არის საუბარი. ვერ გეტყვით, რომ მარტივი იყო ის ცვლილებები, როდესაც ჩვენმა
ინდუსტრიამ თავისი შემოსავლების ნახევარი დაკარგა, მაგრამ ამას შევეგუეთ
და ახლა წინ ვიყურებით. ახლა ვცდილობთ, რომ ავუხსნათ მთავრობას და
დაგვიჭიროს მხარი, რომ კი ბატონო გავიგეთ მაგრამ ახლა წავიდეთ წინ.
- რა არის რეალური დრო ცვლილებების განსახორციელებლად და რა სტანდარტები უნდა იყოს?
-
რეალური დრო არის წელს. პირველი ნაბიჯი არის თემა, რომელიც სერიოზულად
განიხილება მთავრობაში მაგრამ სამწუხაროდ ჯერ კიდევ ვერ მივიდა
გადაწყვეტამდე, ეს არის სავალდებულო დაზღვევის გავრცობა სატრანზიტო
მოძრაობაზე საქართველოში. ანუ საქართველოს მოქალაქეს და ბიუჯეტს აქედან
ექნება მხოლოდ დადებითი შემოსავალი. ჩვენ ახლა გვჭირდება სიგნალი
მთავრობიდან იმის ფონზე, როდესაც გადავადდა ესტონურ მოდელში ჩვენი ჩართვა,
რომ მთავრობა ხედავს სადაზღვევო ურთიერთობების განვითარების მნიშვნელობას.
- რა არის თქვენი არგუმენტები, რომ მყისიერად უნდა ჩაერთოთ მოგების გადასახადის ესტონურ მოდელში?
-
უპირველეს ყოვლისა არის ის, რომ ინდუსტრიას ძალიან ჭირდება კაპიტალიზაციის
გაზრდა. ამის მიზეზი არის ის, რომ ჩვენ დღეს ვზრდით მოთხოვნებს კაპიტალის
მიმართ, წელს შემოგვაქვს ეგრედწოდებული სოლვენსის ინსტრუმენტი და ის
აუცილებლად მოითხოვს კაპიტალის გაზრდას. სწორედ ამ კაპიტალის გაზრდის მხრივ
ძალიან მნიშვნელოვანი იქნებოდა ამ რეფორმაში ჩვენი თავიდანვე ჩართვა.
- ამ ეტაპზე, როდესაც თავიდანვე ჩართულები არ ხართ, რა რისკები დგება?
- რისკს ვხედავ იმაში, რომ რთულია ახსნა საერთაშორისო პარტნიორებთან თუ რატომ არ ვართ ჩართულები.
- ეს რა გავლენას იქონიებს?
-
ეს გავლენა რთული საპროგნოზოა. თუ სხვა ღონისძიება არ გატარდა, რომელიც
ნამდვილად გასატარებელია და მთავრობამაც იცის ეს, ესე იგი რაღაც დროით
ყველა იქნება შეწუხებული.
- სავალდებულო დაზღვევის კომპონენტს განიხილავთ როგორც დამაბალანსებელს იმისა, რომ ვერ მოხდა თქვენი ჩართვა რეფორმაში?
-
დამაბალანსებელს არა უშუალოდ ფინანსურად, არამედ განწყობის საჩვენებელს.
იმის დასტურად, რომ საქართველოში სადაზღვევო ურთიერთობების განვითარება
მთავრობისათვის ერთ-ერთი პრიორიტეტია.
- დღეს არ ჩანს, რომ ეს არის ერთ-ერთი პრიორიტეტი?
-
ნამდვილად არ ჩანს, იმიტომ რომ ამ თვალსაზრისით უნიკალური ქვეყანა ვართ,
სადაც მთავრობა ფაქტიურად არ იყენებს დაზღვევას რისკების სამართავად.
ერთადერთი სფეროა სადაც ჩვენ პილოტურად ვმუშაობთ მთავრობასთან, ეს არის
აგროდაზღვევა, რაც ძალიან საინტერესოა.
- სახელმწიფოს ჩართვა რატომ გჭირდებათ, კერძო სექტორი ვერ უზრუნველყოფს რომ გამართულად იმუშაოს სადაზღვევო სექტორმა?
-
ეს არის დაზღვევის სპეციფიკა, როდესაც ადამიანებს არა მარტო იქ, სადაც
დაზღვევის კულტურა არ არის და ოჯახიდან არ მოსდგამთ, რომ დაზღვევა მათი
ცხოვრებისთვის მნიშვნელოვანია, ასეთ და ბევრად წინ წასულ ქვეყნებში
იყენებენ უალტერნატივოდ, არაერთ სავალდებულო დაზღვევას, იმიტომ რომ რაღაც
რისკების მართვას ვერ მიანდობენ ინდივიდუალური ადამიანების
გადაწყვეტილებას.
-
თქვენ თვლით, რომ ამ ტიპის რეგულაციების შემოღება შენელებული ეკონომიკის
ზრდის ფონზე და იმ ფონზეც როდესაც ქვეყანა ღარიბია, მაინც შესაძლებელია?
-
რასაკვირველია. რაზეც ჩვენ ახლა ვლაპარაკობთ, ის მხოლოდ ხელს შეუწყობს
საქართველოში ეკონომიკურ პროცესებს, იმიტომ რომ ეს არის დაახლოებით 60
მილიონიანი ექსპორტის გაჩენა, რაც ბალანსის თვალსაზრისით ძალიან
მნიშვნელოვანია. რასაკვირველია, პრობლემას ვერ გადაწყვეტს, მაგრამ სერიოზულ წვლილს შეიტანს და სოციალური დაცვის მნიშვნელოვანი ზრდაა.
- თუ გქონიათ კომუნიკაცია ხელისუფლებასთან, თუ მიაწოდეთ მათ არგუმენტები და რეკომენდაციები?
-
ეს მთავრობაში უკვე ინიცირებულია. მთავრობის შიგნით ამაზე მიდის მუშაობა. 1
წელია ამაზე მიდის საუბრები და ჩვენ ამ დროის განმავლობაში 60 მილიონიანი
ექსპორტის ზრდა დავკარგეთ. მე არ ვსაუბრობ ისეთ საკითხებზე, რომლებსაც
ხელისუფლება არ იზიარებს და ჩვენ სერიოზული არგუმენტები გვჭირდებოდეს. ეს
სრულიად გაზიარებულია მათ მიერ.
01.04.2016
